Eraldaketa Digital Jasangarrirako heldutasun-eredua

Lanbide Heziketako ikastetxe batek gobernantza digitalerako beharrezkoak dituen egitura, prozesu eta politikak ezarri behar ditu, antolamendu eta estrategia digital egokien bidez erakundea eraginkortasunez gidatu eta administratzeko. Lidergo sendo batek, erabakiak hartzea eta eraldaketa digitala ikastetxearen kudeaketan aurrera eramatea ahalbidetuko du. Bide horretan, prozesu eta politiketan genero eta talde zaurgarrien arrakalari aurre egiteko irisgarritasun eta inklusio digitala bermatu behar ditu ikastetxeak. Baita, ingurunearekin komunikazio eta harreman digitalak zehaztuko dituen komunikazio-estrategia garatu ere. Hori lortzeko, lankidetza sare digitalak ezarri eta bultzatu behar ditu, ikastetxea osatzen duen komunitate eta beste erakundeekin lankidetzan aritzeko eta ezagutza partekatzea bermatzeko.

Ikastetxeak eraldaketa digitalarekin lotutako helburuak zeharka integratu behar ditu ikastetxeko plan estrategikoetako helburuetan, beti ere heldutasun-ereduaren lau eremuak barneratuz eta estrategia digital honen diseinuan eraldi taldearekin batera alor eta prozesu arduradunek parte hartuz. Ezinbestean, plana sustatu ahal izateko beharrezkoak diren baliabide eta pertsonak esleitu behar ditu ikastetxeak.

Eraldaketa digitalaren garapenak aintzat izan behar du gizartearen aniztasuna; aukera-berdintasuna ziurtatuz. Aniztasun funtzioanalari irisgarritasun eta inklusio digitala bermatuz, Talde eta pertsona zaurgarrien baliabide eta prestakuntza digital beharrak asetzeari arreta jarriz eta genero-oreka erraztuz eta indartuz; beharrezkoak diren prestakuntza eta sentsibilizazio jarduerak planifikatuz.

Ikastetxeak informazio-sistemak kudeatzeko politikak definitu behar ditu; bertan azpiegitura digital, software, erabiltzaile kontu eta sistema digitalei buruzko irizpideak eta lan egiteko modua jaso behar direlarik. Era berean, ikastetxeak ezagutzaren kudeaketa modu antolatuan egin behar du, besteak beste ezagutza-mapa, dokumentu-kudeatzailea eta ikaskuntzarako plataforma birtuala zehaztuta egon behar dutelarik. Baita ere, prozesuen kudeaketa digitala ahalbidetaruko duten neurriak hartuko ditu, informazio eta datuak modu zentralizatuan kudeatuz. Berebiziko garrantzia izanik kudeaketa eta politiketarako erabaki estrategikoak hartzerakoan datu-analisian onarrituta egotea.

Ikastetxeak, irakasle eta ikasleek, baliabide digitalak partekatu eta lankidetzan aritu ahal izateko beharrezkoak diren teknologia digitalak eskaini behar ditu. Bestalde, ikastetxeak komunitatearekin, izan ikastetxean bertan izan beste ikaskuntza-erakundeekin edota izan sektore publikoko nahiz pribatuko erakundeekin, ezagutza partekatzeko jarduerak eta ekitaldiak antolatzeko aukera eskaini behar du (aurrez-aurre, online edo formatu konbinatuan).

Ikastetxeak komunikazio-estrategia bat finkatu behar du non helburu taldeak identifikatu ondoren, hauekin komunikatzeko teknologia egokiak aukeratu eta erabiltzen dituen, besteak beste, webgunea, sare sozialak eta ikasketa plataforma. Honetarako, ikastetxeak nortasun digitala eraiki behar du, komunikazio planean hau sortzeko jarraibideak eta erantzukizunak argi eta garbi zehaztuz. Aldi berean, datu pertsonalen babesa bermartuko duten prozedurak martxan jarri behar dira, irakasleak formatuz, babestu beharrekoak identifikatuz, segurtasun dokumentu bat sortuz eta honen jarraipena eginez hobekuntzak egin ahal izateko.

Irakasle batek gaitasun digitalak landu, garatu eta barneratu behar ditu, irakasle lanbidearekin lotutako zereginak aurrera eraman eta irakaskuntza eta ikaskuntza prozesuan aplikatzeko. Zentzu horretan, hezitzailearen gaitasun profesionalak lantzeak irakaslea digitalki komunikatzea, elkarlanean aritzea eta profesionalki garatzea ahalbidetuko du. Bestetik, Hezitzailearen gaitasun pedagogikoek, irakaskuntza eta ikaskuntza estrategia eraginkor, inklusibo eta berritzailea sustatzea erraztuko dio. Azkenik, berebiziko garrantzia hartzen du ikasleen gaitasun digitalak erraztu eta sustatzeak ere, hots, ikasleak aro digitalean, bizitzan eta lanean aktiboki parte hartzeko prestatzea.

Eraldaketa digitalak ikaskuntza-prozesuaren hobekuntzan lagundu behar du esanguratsuagoa eta errealagoa izan dadin. Horretarako eraldaketa digitalerako hausnarketa metodologikoa ikastetxe osorako egin behar da eraldaketa digitalerako taldearen (eraldi) laguntzarekin, ondoren hausnarketa horren emaitzak prestakuntza ziklo eta ikastaroetan ezartzeko. Hori dela eta, ikaskuntza-prozesu eta ebaluazio estrategiaren diseinua, datu-analisian oinarrituta egin behar da. Hari berean, baliabide digitalen sorrera edo berrerabilpena, prestakuntza-estrategiari egokituta egin behar da; beraien kudeaketarako dagozkion babesa eta banaketa ziurtatuz.

Ikastetxeko zerbitzu digitalak txukun eskaintzeko ezinbestekoa da azpiegitura digital sendo eta egokiak izatea. Horretarako, ikastetxeak zerbitzu eta azpiegitura digital hauen kudeaketa eta mantentzea burutzeko dokumentazioa eduki behar du, adibidez plan eragile bat. Ezinbestekoa da erabiltzailearentzako zerbitzuak erdigunean jartzea ere, laguntza teknikoa eskainiz eta inklusio digitala bermatuz.Ikastetxeak ikaskuntzarako gune digitalizatuak eskaini behar ditu ikaskuntza hobetzeko. Besteak beste, murgiltze-teknologiak dituztenak, multimedia baliabideak sortzekoak eta lankidetzarako eta elkarrekintzarako guneak eskainiz. Garrantzi haundi eman behar zaio, cloud computingeko aroan, nonahiko ikaskuntzari; banda zabaleko interneteko konexioak ahalbidetuz eta BYOD politikak (norberak bere dispositiboa ikastetxera ekartzeak) sustatuz.